Hope

European Championship Qualifying ah beiseina mei chher thi tep tawh chu chhem alh a awm leh in Tunkar Nilai Zan khan Georgia khel thiam rual chu tlawm in an awm!! Israel chuan Point 10 a hmu ve leh ta pang mai!!Bloomfield Stadium a Israel khel thiam rual leh Georgia Khela te an han in nuai tak tak mai chu In chhung lum atang pawn tiril a ti mur ve ar ar thei nia!! First Half ah tu mah mah in an khung lova, Georgia lamin an nawr viau a, mahse Goal em chu an nawr thleng pha bik lova. Khel hnihna an han tan leh a, a nawr tu ngai bawkin an nawr leh at at reng a, Minutes 50 naah chuan Manager Luis Fernández chuan Tal Ben Khaim-a a luh tir ve ta a, a luh atanga reilo teah chuan a ti nek nek a, a thiante Ball siam Chance vawikhatna chu hlah miah lovin Israel tan mawi takin Georgia Goal pui Len a chhuih puar ta pup mai a ni!! Khel leh ah Latvia sut leh tur a ni dawn a, Chak leh ngei se kan duhpui hle mai!! Israeli Football atchilh tak tak tute chuan Israel mipui te chu dem in Europe Ram leh khawvel Ram dangah te chuan a Ram pum huap in Ram tan a khel te tan tan an la thin a, keini ve chu kan Ramah ngei pawh a hmun a en a, boruak siam aiin mahni in lum atanga en kan thlang zawk a, hetiang reng chuan chak zel tlak pawh kan ni love an tih laiin thenkhat te erawh chuan Ram dang mi Manager a lak vangah an puh ve mek a, tun hma kemahni mi leh sa te ngeiin min hrual lai kha chuan a Ram pum nawkin kan thawk chhuak ve thin kha a ni a, Ram dang mi Manager a kan lak a chinah a tla hniam ta mai chauh a ni anti ve bawk!!

Engvang in nge Hmeichhia ten Sipai ah indo mi ah an tan ve?

Israel dan ah chuan mi tupawh harsatna leh buaina bik a nei anih lem loh chuan ram tan leh ram venhimnan  sipai a kal ngei ngei tur a ni a, hmeichhia te  pawh mipa ang tho in an kal tur a ni a, an kal hun chhung erawh chu a tawi deuh a, tin hmeichhia sakhua miten sipai chu sakhuana nen a tih dun  harsa an tih chuan an tih tur Shirut Leumi ( Ram tan a in pek na )  siam  sak  bawk anni. Sipai hmeichhia te hian a tlangpui in sipai an tan chhung in Office lam hna te leh thil dimdawi deuh te an khawih tlang pui thin a, mipa te ang in indo na ah te an chhuak ve ngai lem lo. Nimahsela kum sarih-riat vel kal ta atang khan hmeichhia te hi indo dan te zirtir ve in indo mite zing ah telh ve tan a ni a, tin anmahni tan hial Butalion bik pawh din hial a nghe nghe a ni. Hetiang a hmeichhia te Indo mi te zing a telh ve tur a hmala tute hi Hmeichhia pawl mizo in MHIP kan tih ang mai ho kha anni a, anni chuan mipa ai in kan duai bik lova, chuvang in hetiang a hmeichhia telh ve loh hi in hleibik neihna a ni a, chuvang in thil dik lo a ni tiin an phun nawi a chumi vang chuan anni chu telh ve anni ta a ni. Nimahsela mi thenkhatin chhuina an neih ah chuan hetiang a hmeichhia pawl ten hmeichhia te sipai indo mi te zing a telh ve an ngiatna chhan hi chu engdang vang nilo in  Israel venghim tu kan Sipai te leh  Israel Defence Force te tih hnufualna tan a hmalakna  mai a lo ni reng tih hmuh chhuah a ni. Heng hmeichhia pawl te hi Left wing (Semolanim) an tih ho, ram hmangaihna neilo leh Israel ram te pawh Arab ho hnen a pek duh pawl te  anni a,Israel chu kan chhehvel te ai a sipai chakber leh ralthuam thaber te kanni a,heng vang hian tuman min ngam lo in min hlau a,tin Palestine ho te pawh in duh ang in min rawn bei ngam lo ani. Chuvang chuan hetiang pawl te hian kan sipai te hi an chaklohna tur in hma la ila,kan chhehvel ten min ngam se, an ram kan lak sak Judea leh Samaria te hi matheilo in kan pe let leh mai dawn a lawm ti a an hmalak na alo ni reng mai.Hmeichhia te hian mipa theih ang an thei ve lo a, an huai sen tawk lo bawk a, tin an tha in mipa tha pawh a phak hek lo a,chuvang in heng hmeichhia te hi kan sipai a dinhmun sang leh  mawhphurna te chelh tu te annih chuan kan sipai chakna chu kan lo ti nep dawn tih na a lo  nimai dawn ani ti a an hmalak na ani.

Menashe leh Kei- Deedeei Pa

Khawi Bung leh chang a in ziak nge tih thlu lovin hei ka lo hriat ve thin dan ka’n rawn sawi ve mai mai teh ang!! An naupang ber ‘Taite-a’ (Binyamin) a Ipah ber kher Lal No an hmu ta tlat mai sia, No rutu chu hrem loh a chhuah mai mai chi a nih loh avangin kan Pu Yosef-a chuan No rutu chu hren a tum ta chiah mai le. Chutah le Yahuda-a thin in a tuar ta lo, Yosef-a chu pan hnai in, ‘Enthla tuah min puh tawh a, tunah ruk hmangah min puh leh ang maw? He khawvel leh khawvel lo la awm tur a ka nunna zawng zawng chhal in ka pa hnenah Taite-a hruaikir leh ngei turin ka in tiam a, ka hruaikir loh chuan ka pa chuan a tuar zo lovang, a aiah kei hi min la ta che, chuti a nih loh chuan Aigupta hi mit khap kar lekin ka suasam chhe vek ang a, Nang leh Pharoah-a leh a mite zawng zawng hi ka pawt darh vek mai ang che u” tiin a ke pakhat chu an per dat a, chutah le Aigupta chu a nghing in a nghing ta dur dur mai a, Pharoah pawh a Lal thutthleng atangin a tla dawp a, Lir ropui a nging a ni ringawt. Yahuda-a hian a awmbawr velah hian hmulsen pakhat a nei a, a thinrim a piangin chu a hmul chu lo chawr chhuakin a kawr a rawn tawn tlang a, chutih hunah chuan a thinrim tawh hle a ni tih amah hrechiang tute chuan an hre kar a, an in thiarfihlim vat thin.

Saum leh Bnei Menashe!! mamawitei-pa

khawinge tuntum chu Parashat shavuat, Halakha tiin han ziak ve teh ang ti turin kan zir lo bawk nen, hriat nei lo nafam chuan a thiamte ziak kan lo chhiar leh nuah nuah ang a, kan lo pawm leh thlup mai zel mai a niang chu.

Thiam ve leh hriat ve chhunhnathawhna lam atanga experience lam ve thung tih mai loh chu thudang nei ve hek lo le kan ziak leh poh a ni ang chu. Kan thawhna chu puan rawng tial  a ni ber awm e. Kan rawng hman chu rawng diak a ni a avar thianghlim tak mai kg100 chu 100000 gms a ni a chutah chuan kan duh rawng  chi hrang hrang  kan pawlh mai a. Eg:- a dum kan duh chuan  avar  100,000 gms ah chuan a dum 50gms vel kan telh a kan chawh  lohchuan a var chungah chuan a dum chu a awm ve mai a, tichuan khawl hmang in kanchawk ta a, a tirah chuan a dum pheuh pheuh a ,a rei hnu chuan a var kha a dum ah a lo chang ta vek anih chu. He tiang ang deuh bawk hian saum ah hian soda kan telh chuan eng vak ani lo ,kan chawh chuan a phuan buah buah  thung thin,chutiang chu saum bawl an ti thin.

Keini B nei Menashe te chungchangah lo lalut  ta ila, kan zingah kristian  pakhat a lo awm ve a ,Tichuan kan chanchin bu pakhat chuan Menashe zingah kristian 60 an awm tih an han chhuah meuh chuan a hrechiang lo lo kan tawng huai emaw tih mai turin thu a tama,kan inhriattam siakin,a then an lo spy vel thul,Mizoram lam chhuak chuan ‘tiang zah zah chu Manipur lam unaute zingah ani ang’ kan ti rilru he ho hlawm a .Chutiang bawkin Manipur lam unau chuan “kan Mizoram lam unau te an ni ang “an ti ve bawk a .kan in ringhlelh deuh rum hlawm ta mai a .Chanchinbu trhen in mi pariat an awm tih te an lo chhuah ve bawk emaw ni?
Amah ber hmaichhan a ka zawh lah chuan” kei bak tumah ka hre lo chanchinbu a chhuahtu te khan an hriat tam khawp kha” a ti sam et mai si a.Tichuan kan in bawl phuan ta zel a, rinhlelh tur te kan dap zel a chu mai chu duhtawk lovin internet lam ah te kan tuan zel a, kan phuan tulh tulh ta mai. Zo hnahthlak khawvel hmun tin a mi ten min rawn bawl pui tan ta mek zel in min rawn pir pui chho mek zel ta nih hi maw !!.Saum a soda awm pawh hi chawh lem loh chuan a phuan ngai lova chawh erawh chuan a phuan liam buah buah thrin anih kha. Saum ei thrang khan in hriat vek kha .A ti phuan tu ber kha suah chhuah mai dante kan hria anih lem loh chuan chawk phuan vak lo khan tih dan te a awm mial se chaun zia zawk lawng maw aw!!! Tunah zawng a phuan ta anih hi eng tin ni zel hlawm ang I maw?

Tu thiam loh nge? Deedeei Pa

Tunlai kan mite zingah Kristian awm ang in kan thang huai a, ‘Mihring ring a’ te kan tia, ‘chet a hun ta’ kan ti thul. Ne, Kristian um darh tur a hma kan lak tlan hi a pawimawh em em a, in tih bikna emaw, a pawl zawng emaw a ngai lova, a chhungkaw bing in tih bikna emaw  ti lova hnam ang a kan tan tlan a pawimawh em em a ni. Mimal mai a hneh chi a nih loh avangin kan zavaia kan beih a va pawimawh em! Hma la tu an awm phawt chuan kan thlawp mai ang chu. Hetiang a Kristianna kan um bo tak tak duh a nih chuan mitinte fir takin in ennawn theuh ila, Kristian thiante email in thawn tawn te leh Kristian Official Website tlawh thin te thleng a kan vai hma a ngai ngei ang. Kan zinga pakhat, kan Juda-na Ticket a Israel thleng mahse a pathian a paih leh theih tak si loh vang a ‘Kristian ka ni e’ ti ta mai kan zingah a rawn chawrchhuak nawlh mai a, kan zingah amah ang type deuh ‘La thlah thei ngang lo’ ang chi hi tunhma lam paw’n kan zingah awm ang a sawi an awm leh zauh thin a, amaherawhchu atthlak tak a thil ti erawh an awm kher lo. Hetiang ang boruak hi kan la tawn ngai loh thil anih avangin a boruak a rit a, a mi deh a na tlat!! Hnam ang a hma kan lak tak tak angai a ni. He ‘Mihring ring a’ hian engtiang a Ramthianghlim rawng thleng ve mai nge a nih? Ngaihtuah buai ruai ai chuan, kan chhui phak lekah thil a la awm a, ‘Chet a hun ta’ ti a, ‘Tu Giur nge? Tu tawng leh sak a tling nge a nih? Tih pawh kan khawih phak rengah a awm a, ral atang nilovin a hmunah i bih teh ang u khai!! Krista chanchin puang darh pap pap turin rin tlak a ni em? A Kristian puite paw’n an hmang duh kher ang em aw tih tur khawp mi a ni ve reng reng a, Zotawnglo tawng dangah phei chuan ngaihtuahawm ve deuh tur a niin ka hria!! Heti khawp a mi lawilo anih avang hian kan Hnam mualpho phah nan kan hmang mai ang tih ka hlauthawng ru ve em em  a ni. Hetiang ang Hnam hmel khawih danglam thei thil hi chu ri bung bung emaw, au leng lung chungin emaw a rel chi a nih hmel lova, rui chung ngat phei chuan a chi lo leh zual ang. Rilru fim tak, fimkhur tak leh zaidawh tak a kan kal pui loh chuan kan hmel ang pu, kan tawng ang  tawng, kan chawr chhuahna atanga chawr chhuak ve tho a nihna ah hian kan mualpho puiin kan mawng kan hlim zawk ang tih a hlauhawm. Hetiang kan hnam chhungkaw chanchin ngat phei hi chu duh rum hle mah ila khawvel hriat a aupui lung lung chi niin ka hre lo. Kan chenna theuh a Rav te, mipui mimir te hian hre ta se chuan kan fate, kan makpa te, kan tute, kan thalaite an lo awm khawloh deuh leh, inkhawm an lo thlahdah deuh changte hian Kristian tread in min tread ang tih a hlauhawm a lawm le. Alyah tinah Sakhaw hawilo zawng a peng chu an awm ve ziah a, Kheloni nun in hun an hmang a, Dati leh Kheloni an in then a, mahse Juda vek an la ni. Mahse keinin kan zinga Kristian awm kan aupui chiam chiam chuan kan fate Shabbat zawm lo emaw, inkhawm thlahdah deuh emaw an lo awm palh pawn Kheloni leh Dati ti lova, Kristian ti zawng a min dem hlauh chuan chuti hlauh chu a ni mai. Kan khaw awmna tinah hian enthlatu an dah ang a, kan thil tih a piang min enthla ang a, kan chep riau ang tih te hi ‘Danger mai mai’ deuh a sin.

KEI LEH EILAT TIUL-Taia-pa

Khauphar phur

   Tin heti hi ani a,kan hotute thahnemngaihna azara Eilat Tiul tur tih thawm a lo rik phat atang khan engtin emawni ka awm huih nghal pang nia,tawi zawngin ka phur chiang..A buai deuh tih thawm a awm pawh khan Tawngtai na a thawh mai ka rilruk hman deuh hial tawh.Ka fapa mawlh hi vannei ka ti khawp,a ni ang rual kan nih in Eilat chu sawi loh Aizawl hming takngial pawh kan la hre lo,chutih laia ka fapa heti rual lekin khawvel tourist hmunpui a hmu bik tur chu ka thik tep ani..

Pa theuh theuh

   Pa theuh theuh hi a lo in an loh theih khawp in ka hre ta.Deedee-i pa leh Igal-a Pa ten kal dawn trep thlenga naupang chaw tur leh TiTul vel ken tur an buaipui a,an thunkim loh an ngaihtuah buai lai khan,keini, kawmthlangpa Marina nen chuan nu berin naute thil leh pa ber thil an thun mawlh mawlh laiin’Eilat ah THIL a to an gem?Hotel atrang thil leina tur a hla ang em?Ken lawksa a chi viau lo maw?Hotelah a thlawna intur a awm ang em?Kan Hotel thlennaah hnamdang tui cheng en tur a awm ang em aw?Kan room tur chu Swimming pool lan theih na ngei ni se tih vel leh Thil man a to viau ang em ?  tih lam kha kan lo ngaihtuah daih pek asin ni..Khadaih kha asin le..Pa kan ni miau a..

Eilat..oh!!..Eilat!!

       Eilat a Shabbath hman meuh chu a boruak a dang zar mai!! ‘Khad Peami cups’ rawn chhuahna khawpui meuh zawng tih mai mai a lo ni lo tawp mai a!! Yom-Khamishi zinglam Dar:8:00 vel a chhuah tum khan Dar:9:00 ah pawh thutna kan la rem rual thei lo!! ‘Kan len loh chuan midang kian mai ang..’ ti rilru chung a in siam kan ni bawk a,kan tei kan tei a,kan in tei chuang threlh!!Menashe rilru tha tak tak te avangin kan in hnawh leng hram a,kan lawm leh hnuhnawh hle sia!!In Editor ve hi ka trutrawi lo thin em a tin ni e!!Ha!!ha!!ha!!

     Engtih tih in enmawni dar kaw pelh fe tawh ah kan tlan chhuak ve thei hram a,Dimona Kenion thar a Hafsakah tur chuan kan tlan ta vang vang ani.Dimona thleng pawh hi duh tawk tham anih teh reng nen chuta tang chuan kan la tlan tan dawn chauh hi a lo ni a!!Dimona a zun ram kan thiar hnuah Eilat lam pan chuan kan tlan tan ta tak tak a,darkar chanve kawng lakah in hnawhpuarna hun kan nei leh zawk tih lovah chuan kawng lakah kan chawl ta lo!!

MIZO RABBI AWM VE TA!! Gershon Ralte

Israel fate sakhuana kawnga kaihruaitu, Pathian thu thiam leh zir sang, Israel fate thlarau nun chawikan  saktu Rabbi kan tihte hi mi ngaihsan awm tak chu an ni tih chu kan hre vek awm e. Kum tam tak Torah zirna hmunpui Yeshiva a an zir hnuah, Judaism sakhaw zirna thuk ber ber Talmud, Gemara, Mishna, Tanach, Midrash leh Shulchan Aruk, Juda sakhaw dan Halacha chipchiar ber ber an zir hnuah Rabbi atana Ordained niin Rabbi nihna Title hi an dawng thin a, sakhaw lama mipuite kaihruai thei tur khawpa zir chiang leh zir sang annih avangin mite ngaihsan an hlawh em em a ni. Hetianga Rabbi tia koh theih hi Mizo zingah kan awm ve ta hlawl mai a, a ropui em avangin a chanchin tlem kan han ziak ve a ni. He Rabbi nihna zir chhuak ve ta hlawl mai hi a hming chu Gurion Isaac Sela, Mizoram atanga Israel kal niin January 12, 2009 khan SSC Rabbinical College, Jerusalem Old City ah Rabbi rual ten Rabbi atana Ordain in Rabbi nihna Certificate an hlan ve ta ruau mai a. Ani Rabbi Gurion Isaac Sela hi Pu Eliezer Sela leh Pi Doliani, Aizawl Civil Hospital a Senior Nurse ni thin, tunhnai lawka pension ta te fa 9 zinga a parukna niin J.L. High School a zirchhuak a ni a, Pi Zualbawihi – Pi Lalsangzuali Sailo Padma Shree (L) phei chuan a duhsakin nau ang hiala a en thin a ni. 

Israel leh Hamas buaina kal zel

By: Ela Khiangte, Australia
Israel leh Gaza Strip Hamas-ho buaina hian inrem lam aiin buai lam an pan chho zel a, United Nations leh khawvel ram hrang hrang ten inrem tura an sawmna chu hnu chhawnin inrumnuai an tan dawn chauh a ni. December 27, 2008 khan indo an tan a, kar khat chuang lai an indo der ta mai a. Hamasho roket avang hian Israel mi 4 chauh an thih laiin, Gaza Strip-ah hian Israel indo thlawhna bomb avangin mi 420 chuang an thi tawh a, 2,000 chuangin hliam an tuar bawk. Gazaa mithi zingah hian civil mi 100 vel an tel niin UN chuan an report.Gaza Strip-a sawrkarna chelhtu Hamasho hian tuntum indona hi an tan a ni ber a. 27 December khan Hamasho hian Israel ramah roket ( bomb ) 61 leh laipui bomb 33 an kap lut a. 28 December khan rocket 14 leh laipui bomb vawi 16, 29 December khan rocket 57 leh laipui bomb 15, 30 December khan rocket 42 leh laipui bomb vawi ruk, 31 December khan roket 43 leh laipui bomb 25 an kap lut bawk a. Israel Foreign Ministerin a sawidan chuan tuntum indona hi “ Israel sawrkarin Gaza Trip luah leh an duh vang nilovin Hamasho bomb lak ata an inveng ( self defence ) a ni”, a ti. Israel hian an tum ang takin an hriatchianna hmun zelah bomb an thlak a, Egypt leh Gaza leihnuai puk, Hamsho-in ralthuam leh bungrua lakluhnana an hman ber thin chu hmun 40 chuang lai an bomb chim vek a. Hetia kar khat chuang lai Israelin Gaza chu indo thlawhna hmangin bomb nen a beih vak hnu pawh hian Hamas-ho chuan an rocket kahchhuah chu ban zai an rel bik hek lo va, chuvangin Israel hian bomb mai duhtawk lovin lei lam sipai hmanga luhchilh turin a inpuahchah mek a ni. Gaza ramriah Israel chuan lei sipai 2,000 leh indo motor te a chhawp ruih tawh bawk a. Gaza ramria Palestine-ho tamtak chu an insawnbo tawh a, tin, Gaza chhunga ramdang mi la awm te pawh mahni ram theuhah a rang thei ang bera inthiarfihlim turin Israel sawrkar chuan a ngen a ni. Israel chuan Gaza chu indona hmun ( war zone ) tiin a puang hmiah tawh mai a, engtikah nge an inrumnuai ang tih chauh a ni ta e. Hamasho lah chuan an lo hlau bik aw zawng lo mai a, an theih tawpa lo do let turin an inpeih thu an hotu ten an puang awn awn bawk a. Eng tak ang zel ang maw? Khawvel paber America president George Bush-a lah chuan, “ Hams ho hian a ruka an ralthuam lakluh zawng zawng te hi an tihtawp loh chuan inremna siamin awmzia a nei lo, Hamas ho hi terrorist an ni e” ti hmiah mai bawk a.  Source: http://www.zoin.info/israel-leh-hamas-buaina-kal-zel/

Hmelma do mek Israel Sipai huaisente tan!!

Hmelma do mek Israel Sipai te leh Bomb kah phak khua leh a chhehvel zawng zawngte tan thinlung takin Tehillim chhiarna kan awm hmun theuhah i nei ang u!!                                                        Sam 23-na

“LALPA chu mi vengtu a ni a; ka tlachham lo vang.Ani chuan hlobet hring dup hmunahte mi bawhtir thin a: Chawlhna tui kamahte mi hruai thin.Ka nunna hi mi siam that thin a, Ama hming avângin felna kawngahte mi hruai thin.A ni, thihna hlim kawr ruam zawh mah ila, thil tha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan thin a ni.Mi dotute mit hmuhah ka hmaah hian dawhkan i buatsaih thin a: Ka lu hi hriak i thih tawh a, ka novah hian a liam reng a.Matheilovin thatna leh ngilneihnain ka dam chhûng zawng hian mi zui zel ang a: Tichuan LALPA inah kumkhuain ka awm reng ang.